Hoe nou gemaak? Jou liggaam verander, jou emosies oorval jou; jy is angstig en moeg - en skielik wonder jy: Wie is ek en waar pas ek in? Menopouse is veel meer as net ’n hormonale oorgang. Vir baie vroue is dit ’n tyd van diep emosionele en sielkundige verandering – ’n tyd waarin identiteit, verhoudings, selfvertroue en eiewaarde verander en herontdek kan word. In hierdie eerlike en insiggewende gesprek sit Melanie en Maritza om die tafel saam met die bekende sielkundige, Abraham le Roux. Hulle praat openhartig oor angs, depressie, verlies, die gevoel dat jy jouself iewers langs die pad kwytgeraak het, en waarom soveel vroue in hierdie lewensfase skielik “onsigbaar” voel. Abraham deel ’n insiggewende én praktiese raamwerk om hierdie seisoen met meer begrip en selfdeernis te navigeer. Hy verduidelik hoe jy deur vier belangrike areas van selfwaarneming – gevoelens, gedagtes, liggaam en gedrag – weer jouself kan herondek en nuwe betekenis en vreugdes kan geniet. Ons gesels ook oor: * Waarom emosies fisies in die liggaam ervaar word. * Die ongelooflike waarde van goeie vriende, gemeenskap en humor. * Wanneer professionele hulp of medikasie ’n wyse volgende stap kan wees. * En hoe om weer hoop, veerkragtigheid en lewenslus te vind. En bly beslis tot die einde! Die gesprek eindig op ’n ligter noot met heerlike trooskos van Frozen For You, en Abraham vertel ook – met sy kenmerkende humor – presies wat hom deesdae gatvol maak. Hierdie is nie net ’n gesprek oor menopouse nie. Dis ’n gesprek oor menswees. Geborg deur Probitec. https://probitec.co.za